O CL Pintor de Castinande inicia este curso coa lectura desta novela, escrita por Emilia Pardo Bazán e publicada por primeira vez en 1886.
O sacerdote Julián Álvarez diríxese aos Pazos de Ulloa para servir ao Marqués Don Pedro Moscoso como administrador. Nada máis chegar aos Pazos, situados nunha zona rural de Galicia, o sacerdote escandalízase polo decadente estado do pazo e o comportamento de Don Pedro e os seus empregados.
Don Julián aconsella a Don Pedro que cambie de comportamento e de sociedade, e o convence de que marche con el a Santiago de Compostela e busque esposa entre as súas curmás casadeiras. Elixe como esposa a Nucha e con ela regresa ao pazo, xa embarazada dunha nena. Don Pedro amósase desgustado cando nace a súa filla, incomódase polo sexo do bebé, e aos poucos vaise distanciando da súa esposa.
Nucha entabla unha relación de amizade con Julián e pídelle que lle axude a escapar coa súa filla a Santiago a casa do seu pai, xa que teme pola vida da nena se ela morre, pois Manolita é a única herdeira lexítima de Don Pedro se non temos en conta ao neno bastardo Perucho.
No epílogo, relátase a volta de Julián, o sacerdote, dez anos despois aos Pazos, onde visita a tumba de Nucha, falecida seis meses despois da súa marcha. De camiño ao palacio descobre a dous nenos, un vestido con elegantes roupaxes , Perucho e outra con roupa campesiña, Manuela.
Los Pazos de Ulloa é unha novela na que se describe a sociedade galega na época do antigo réxime. Enmarcada na corrente naturalista , esta novela presenta tamén elementos da novela realista e mesmo gótica. Trata o tema do mundo rural. o caciquismo, as clases sociais...
A autora : EMILIA PARDO BAZÁN está considerada a mellor novelista española do século XIX e unha das escritoras máis destacadas da nosa historia literaria. Ademais de novelas e contos, escribiu libros de viaxes, obras dramáticas, composicións poéticas e numerosísimas colaboracións xornalísticas, a través das cales a súa presenza foi constante na España do seu tempo. Coa súa obra e coa súa vida puxo de manifesto a capacidade da muller para ocupar na sociedade os mesmos postos que o home, sen renunciar ao especificamente feminino.( fonte : Biblioteca virtual Miguel de Cervantes)
O CL da BPM de Sober continúa co seu ritmo de lectura , un libro mensual, , pero agora non temos reunións presenciais na biblioteca. Por mor da pandemia. levamos os libros para casa e facemos os comentarios a través do teléfono e por whatsapp. Agardamos poder reencontrarnos moi pronto na biblioteca coas nosas lecturas arredor da nosa mesa.
Comentarios
Publicar un comentario