¿ Que son os poetas (Carmen Gutiérez (inevitablemente poeta)
Os poetas somos predicadores, pregoeiros,
profetas que ignoran todo porque todo o recrean ó seu paso e á súa pegada.
Cantamos discursos das cousas mudas, das pedras ocas coma
campás, dos metais ternos coma escumas tersas e oceánicas.
Os poetas depositamos nos vosas mans as
sementes duras do sangue cotián, desfacemos o barro para diluvialo no voso
peito colectivo.
Somos carpinteiros, labregos, mariñeiros,
ferreiros, nais e pais do vendaval que todo o arrasa para cubrilo de misterios.
Os poetas recollemos a vosa voz dende a nosa
atalaia, aquela que se confunde cos vosos corpos, percorrendo cada membro.
Levantamos, e falo dos poetas, ós vosos
irmáns, o mencer dos petos raxados ,os porqués
que nos enche a luzada única e irrepetible do instante,
Sementamos sombras polos currunchos para
recoñecernos polas rúas dos seres que non se nomean.
Os poetas recuperamos o ouvear dos homes, a
gargallada dos regatos, o asubío dos vagalumes e o arrepío do vento.
Confundímonos cos amantes. Mesturámonos cos
obreiros. Emborrachámonos de brisas novas e brindamos coas treboadas.
Fuximos, os poetas, dos silencios populares,
dos anónimos queixumes dos compañeiros encadeados e dos berros afogados de
todos os que aínda teñen cousas que dicir.
Fuximos para nomear todas as protestas e
denunciar as resignacións.
Comentarios
Publicar un comentario