Interesante e entretida historia a que MARGARITA RODRÍGUEZ OTERO conta na súa última novela e que foi a lectura escollida polo cl da biblioteca neste mes de xaneiro.
Pon de actualidade o ocorrido en Monforte de Lemos co cadro "A adoración dos reis", unha obra de gran valor, do pintor flamenco Hugo van der Goes .
Pertencía ao legado do Cardeal Rodrigo de Castro , que se conservaba no Museo dos Escolapios, e que se vendeu ao Káiser Museo de Berlín en 1913 . Esta venda produciu unha revolta , pois o pobo monfortino non estaba disposto a perder parte do seu patrimonio.
Nas páxinas desta novela histórica , a acción real desenvólvese no ano 2017 a través dos personaxes de Manuel Barcia e Lina que son os que traen á actualidade o ocorrido co cadro de Hugo Van der Goes, mentres se ven inmersos nunha investigación sobre tráfico ilegal de obras de arte.
Á beira destes personaxes de ficción atopámonos con outros reais: Antonio Méndez Casal, historiador e crítico de arte ; Joaquín Arias Sanjurjo, avogado e político ; os escritores Niceto Oneca e Borja Corral, defensores da permanencia do cadro nos Escolapios e en contra da súa venda.
MARGARITA R. OTERO realiza un gran traballo de documentación e investigación histórica e demostra , unha vez máis , a súa pasión polos temas relacionados con Monforte de Lemos e a súa comarca.
O mércores 16 de xaneiro tivemos a sorte de que a propia autora asistise á reunión semanal do CL Pintor de Castinande . Falamos da trama, dos personaxes, do cadro de Van der Goes, do resultado da venda, dos beneficios que se esperaban con esta venda, dos novos proxectos da autora...
Unha tarde enriquecedora e todo un "luxo" poder contar coa presencia de Margarita, estupenda oradora e gran coñecedora da historia de Monforte de Lemos. GRAZAS POR ACOMPAÑARNOS.
Comentarios
Publicar un comentario