ABRIL MES DOS LIBROS

Ilustrado por Mikhaïl Fedorov

Comeza o mes de abril coa celebración do DÍA INTERNACIONAL DO LIBRO INFANTIL E XUVENIL, recordando a H. C. ANDERSEN

DIA INTERNACIONAL DO LIBRO INFANTIL 2017 : Medremos co libro!
Escrito por Sergey Makhotin
Traducido por Sabela González Panizo

Cando era moi neno gustaba de construír casas con bloques e con xoguetes de todo tipo. No canto do tellado, decotío empregaba un libro infantil ilustrado. Nos meus soños, agatuñaba ao interior da casa, deitábame na cama feita cunha caixa de mistos e ollaba para as nubes ou o ceo estrelado. Dependía da ilustración que máis me gustase.

De maneira intuitiva, seguín a norma vital de cada neno, que procura crearse un medio cómodo e seguro; e un libro infantil de certo axudaba a conseguilo.

Logo medrei, aprendín a ler, e un libro na miña imaxinación comezou a parecer máis unha bolboreta, ou mesmo un paxaro, ca o tellado dunha casa. As páxinas do libro semellaban as ás e crepitaban. Parecía que o libro que xacía na repisa da ventá ía saír voando pola fiestra aberta cara a lugares descoñecidos. Collino e comecei a ler, e o libro comezou a acougar. Logo seguín o libro a outras terras e mundos, expandín así o espazo da miña imaxinación.

Que felicidade ter un libro novo nas mans! Ao principio non sabes de que vai. Resistes a tentación de abrir a última páxina. E que ben cheira! É imposible dividir o seu cheiro nos seus compoñentes: tinta de imprenta, cola... Non, non se pode. Un libro ten un cheiro particular, único e emocionante. As puntas dalgunhas páxinas péganse entre elas, coma se o libro aínda non estivese esperto. Esperta cando comezas a lelo.

Estás a medrar e o mundo ao teu redor está a facerse máis complicado. Estás enfrontándote a preguntas que ningún adulto está preparado para responder. Con todo, é tan importante que compartas as túas dúbidas e segredos con alguén! E velaquí que chega de novo un libro para te axudar. Moitos de nós nos temos sorprendido pensando “este libro vai sobre min!”. E, de súpeto, o personaxe favorito parécese a ti. Ten os mesmos problemas e enfróntase a eles con dignidade. E outro personaxe non se che parece en nada, pero queres que sexa o teu modelo a seguir, queres ser igual de valente ou ter o mesmo enxeño.

Cando un neno ou nena di “non me gusta ler!”, a min dáme a risa. Non lles creo. Seguro que comen xelados, xogan a xogos e ven películas interesantes. Noutras palabras: gústalles divertirse. E ler non é un traballo duro de cara a desenvolver os sentimentos e a personalidade, o que é, antes que nada, é un gran pracer.

E, para iso, especialmente, é para o que os autores escribimos libros infantís!

23 DE ABRIL DIA DO LIBRO E DOS DEREITOS DE AUTOR

7  DE ABRIL

Nas merendas con contos imos comezar coa actividade do Día do Libro de este ano, que se chama A volta ó mundo en 80 libros. Partindo desta novela do escritor francés Julio Verne elaboraremos un mapamundi que levará tarxetas con títulos e autores de todos os países do mundo, seguindo a ruta marcada por Julio Verne. 

21 DE ABRIL

Celebramos o Día do Libro (23 de abril)

-          Exposición A volta o mundo en 80 libros

-          Exposición bibliográfica sobre Julio Verne

-          V  Mercadillo de Libros.

-          Bookcrossing: Liberamos libros no parque infantil.

       Ás 18:00h na Biblioteca do Concello de Sober

22 DE ABRIL

Celebramos o Día do Libro (23 de abril)

-          Un libro un agasallo: durante a mañá todos os que se acheguen a biblioteca poden levar un libro como agasallo.

28   DE ABRIL

Concerto de Solistas da Escola Municipal de Música de Sober.

Ás 18:00h no Salón de Actos Centro Sociocultural de Sober

ABRIL MES DOS LIBROS na biblioteca de SOBER